Toshkentdagi yangi avtobus bekatlari uchun davlat mablag‘i ishlatilmayapti

Toshkent shahrida yangi avtobus bekatlari o‘rnatish ishlari davlat byudjeti yoki davlat jamg‘armalaridan mablag‘ ajratilmasdan, xususiy korxona – “Ewi Snacks” MChJ hisobidan amalga oshirilmoqda. Ushbu kompaniya ochiq elektron auksionlarda 230 ta bekatning ijara huquqini qo‘lga kiritgan.

“Ewi Snacks” vakili Jahongir Abdurahmonovning ma’lum qilishicha, barcha xarajatlarni o‘z mablag‘lari orqali qoplamoqdalar va davlatdan moliyaviy yordam olishmagan. U kompaniya tomonidan bekatlarni bosqichma-bosqich qurilish va rekonstruksiya qilinayotgani, hozirda 200 ga yaqin bekat yarim tayyor holatda ekanligini ta’kidladi.

Bekatlarning har bir elementining qiymati aniq shakllantirilgan. Jahongir Abdurahmonov bergan ma’lumotlarga ko‘ra, perron narxi 24 million so‘m, konstruksiya 21 million so‘m, reklama monitorlari (laytbokslar) 8-9 million so‘m, elektron tablo 5-5,5 million so‘m, video kuzatuv kameralar 2-4 million so‘m, o‘rindiqlar 2 million so‘mni tashkil qiladi.

Shuningdek, elektr tarmoqlarini tortish uchun ayrim joylarda 12 million so‘mgacha xarajatlar kelib chiqadi. Vending apparatlari esa 36-40 million so‘m atrofida baholanmoqda. Internet va xavfsizlik uchun SOS tugmasi kabi tizimlarning faol ishlashi uchun oyma-oy abonent to‘lovlari ham mavjud.

Toshkentdagi eskicha bekatlar ko‘pincha metall soyabon va bir nechta o‘rindiqlardan iborat bo‘lib, boshqa oddiy jihozlarga ega. Ammo yangilangan bekatlar imkoniyati cheklangan odamlarga mo‘ljallangan perron, avtobus kelish vaqtini ko‘rsatuvchi elektron tablolar, xavfsizlik tugmasi, kuzatuv kameralar va vending apparatlari bilan jihozlangan.

Yo‘l harakatini tashkil etish markazi xodimi Olloyor Norbo‘tayev ijtimoiy tarmoqlardan olingan taklif va tanqidlarga asoslanib, bekatlarning tom qismini kengaytirish, issiqlikni qaytaruvchi materiallardan foydalanish va gavjum bekatlarga ventilyator o‘rnatish rejalashtirilayotganini bildirdi.

Shuningdek, ba’zi hududlarda bekat dizaynini o‘zgartirish mumkin emasligi ta’kidlandi, masalan Farg‘ona yo‘li ko‘chasidagi bekatlar asosiy yo‘l va qo‘shimcha yo‘l o‘rtasida bo‘lib, soyalanishni ta’minlash imkoniyati mavjud emas.

Toshkent shahar transport boshqarmasi boshlig‘i Mirakbar Ikromov ma’lumot berishicha, shaharda jami 2871 ta avtobus bekati mavjud bo‘lib, ulardan 753 tasi do‘konli bekatlar hisoblanadi. Qolgani esa yetarli darajada jihozlanmagan.

2026-2027 yillarda ushbu bekatlarni qayta rekonstruksiya qilish rejalashtirilmoqda. 2026 yil dekabriga qadar jami 496 ta bekat foydalanishga topshiriladi, ulardan 230 tasi to‘liq zamonaviy, qolganlari esa ijtimoiy bekatlar shaklida quriladi.

Mas’ullar aholining tanqidlari va takliflarini loyiha uchun foydali deb hisoblashmoqda va jamoatchilik fikriga tayangan holda bekatlar dizayni va qulayliklarini rivojlantirish ishlari davom etmoqda.

Bekatni boshqarayotgan kompaniya o‘z investitsiyasini reklama joylash va vending apparatlari orqali qaytarishni ko‘zlamoqda.

Shu bilan birga, bekatlarning tozaligi va chiqindilarni olib ketish ham kompaniya zimmasidadir.

Yangi avtobus bekatlari shahardagi sayohatchilar uchun yaxshilangan sharoitlarni yaratib, jamoat transportini yanada qulay va samarali qilishi kutilmoqda.

Oldinroq Kun.uz aholining yangi bekatlar haqida fikrlarini o‘rganib, shu masalaga oid materialni taqdim etgandi.

Kun.uz tahririyati tomonidan tayyorlandi.